बागमती, ३१ मे २०२५ — युवा कम्युनिस्ट लिग, नेपाल (YCL) को तेस्रो राष्ट्रिय सम्मेलन (२०८२) को पूर्वसन्ध्यामा संगठनभित्र वैचारिक स्पष्टता, कार्यशैलीको सुदृढीकरण र नेतृत्व विकासलाई लिएर बागमती प्रदेशबाट प्रतिनिधित्व गर्ने ‘आक्रोश’ समूहले विस्तृत विधान संशोधन प्रस्ताव सार्वजनिक गरेको छ।

केन्द्रीय सचिव एवं सह-इञ्चार्ज (बागमती) डी.पी. थपलियाको दस्तखत रहेको उक्त दस्तावेजमा संगठनको हालको अवस्था, राजनीतिक चुनौती, र भावी दिशा समेटिएको छ। दुई पृष्ठ लामो दस्तावेजमा वैज्ञानिक मूल्याङ्कन, संगठनको भौतिक तथा वैचारिक सुदृढीकरण, र युवाको सशक्त उपस्थितिबाट नेतृत्व विकासमा जोड दिइएको छ।

प्रस्तावमा जनयुद्ध र जनआन्दोलनको पृष्ठभूमिमा स्थापित YCL लाई आजको सामाजिक यथार्थअनुसार रूपान्तरण गर्नु अपरिहार्य रहेको उल्लेख छ। विश्वस्तरीय समाजवादी आन्दोलन, नेपालभित्रको राजनीतिक गतिशीलता, र युवा पुस्ताको भूमिकालाई मध्यनजर गर्दै संगठनको संरचना, कार्यशैली र नीतिगत दृष्टिकोण पुनरावलोकन गर्नुपर्ने आवश्यकता औँल्याइएको छ।

‘आक्रोश’ समूहले विधान संशोधन प्रस्तावमा १० प्रमुख बुँदाहरू प्रस्तुत गरेको छ, जसमा निम्न बिषयहरू उल्लेखनीय छन्:

1. कार्यकालको सीमा निर्धारण – अधिकतम एक कार्यकाल कायम गरिने, विशेष परिस्थितिमा मात्र पुन: चयन हुने व्यवस्था।

2. कार्यसम्पादन मूल्यांकन अनिवार्य – सम्मेलनमा विगतको कार्यसम्पादनको समीक्षा गरिने।

3. उमेर सीमा तोक्ने व्यवस्था – नेतृत्व तहमा १६–५० वर्ष उमेर समूहका व्यक्तिहरूलाई प्राथमिकता दिने।

4. दक्ष नेतृत्व निर्माण – जिम्मेवारी दिने प्रक्रियामा क्षमताको आधारमा छनौट गरिने।

5. समावेशिता र विविधता – संगठनको संरचना र

भूमिकामा सबै समुदायको समावेश सुनिश्चित गरिने।

6. सशक्त मूल्यांकन प्रणाली – नियमित कार्यसम्पादन मूल्यांकन र प्रोत्साहन/जवाफदेहिता सुनिश्चित गरिने।

7. नीतिगत स्पष्टता र अद्यावधिकरण – संगठनको नीति, दृष्टिकोण र कार्यक्रमहरूलाई वर्तमान सन्दर्भमा परिमार्जन गरिने।

8. सदस्यता नवीकरणमा पारदर्शिता – सदस्यता वितरण, नवीकरण र जिम्मेवारी दिने प्रक्रियामा पारदर्शिता अपनाइने।

9. युवा सहभागिता विस्तार – YCL को युवा फोरममार्फत युवा सहभागितालाई संस्थागत गरिने।

10. संगठनात्मक अनुशासन र जवाफदेहिता – निर्णय प्रक्रियामा स्पष्टता र कार्यान्वयनमा कडाइ गरिने।

प्रस्तावमा भनिएको छ, "वर्तमान विश्व परिदृश्य, नेपालको सन्दर्भ, र युवाहरुको बदलिँदो सोचका बीच YCL लाई आधुनिक र प्रभावकारी संगठनको रूपमा पुनःस्थापना गर्न संशोधन अपरिहार्य भइसकेको छ।"

यस प्रस्तावलाई राष्ट्रिय सम्मेलनमा प्राथमिकताका साथ छलफलमा ल्याई, आवश्यक निर्णय लिन ‘आक्रोश’ समूहले अपिल गरेको छ।